Á ljósmyndastofu dómsmálaráðuneytisins

Við fórum með drengi vora tvo á opinberan kontór í Borgartúninu í dag til að sækja um vegabréf fyrir þá eftir kúnstarinnar reglum. Þá reyndi á ríkisvædda passamyndatöku sem tekin var upp að frumkvæði dómsmálaráðherra Sjálfstæðisflokksins eigi alls fyrir löngu. Ríkið er með öðrum orðum búið að leggja af með lagaboði að almenningur geti látið taka af sér mynd þar sem honum sýnist í vegabréf og framvísað hjá skriffinnum þess. Takk fyrir, góðan daginn. Nú er ríkið sjálft orðið ljósmyndari þjóðarinnar fyrir vegabréf þess og fjöldi atvinnumanna í ljósmyndun situr eftir með sárt ennið, færri verkefni og minni tekjur. Lifi frelsið, hin háleita einkavæðing og allt það. Halleljúja og amen.

Og ekki flýtir ríkisvæðing ljósmyndunar fyrir sjálfu framleiðsluferli vegabréfa. Það tekur 10 virka daga að búa til slíkan bevís; endurtek: TÍU vinnudaga! Nema vér kúnnar borgum tvöfalt, þá treysta skriffinnar kerfisins sér til að klára klabbið á fimm dögum.

Það eru hvorki til rök fyrir ríkisvæðingu passamynda né þessu ógnardrolli við að búa sjálfa passana til.

Athugasemdir

[Þórir Jónsson (IP-tala skráð) 20.7.2006 kl. 00:33]

Ótrúlegur asnagangur þessi myndataka ríkisins. - Þekki dæmi þess að vegabréf, sem sótt var um hér í Ólafsfirði án "flýtimeðferðar" kom daginn eftir en annað, sem fékk "flýtimeðferð" kom ekki fyrr en eftir marga daga!