Fellihýsamálið - finale

Af og til kemur fyrir að ég hitti fólk á förnum vegi sem spyr um lyktir fellihýsamálsins mikla, sem byrjaði hér á blogginu í vor og rataði þaðan inn á síður Blaðsins og Morgunblaðsins. Þetta varðar altsvo þrjú fellihýsi og eitt hjólhýsi sem geymd voru í skemmu á Vatnsleysuströnd í vetur og skilað var í hendur eigendanna stórskemmdum. Þar á meðal var fellihýsið Fengsæll GK sem við Álftlendingar keyptum á sínum tíma af vélstjóra í Grindavík. Nú á Fengsæll hins vegar heimahöfn í Fossvogi. Honum var skilað í Vogum rifnum og beygluðum á annarri hliðinni og hefur því verið ónothæfur en er nú kominn á verkstæði.

Hjólhýsið sem í þessu lenti var kaskótryggt og var svo illa farið að Sjóvá leysti það til sín og borgaði eigendunum það út. Við fellihýsaeigendurnir vorum hins vegar allir með vagnana ótryggða í geymslunni og berum skaðann. Hyskið sem fór svona með eigur okkar sleppur með öðrum orðum og reyndi að beygla mannorð okkar ofan á allt annað. Náunginn, sem hafði orð fyrir þessum geymslurekendum, hélt því staðfastlega fram á opinberum vettvangi að hann væri tryggður fyrir skemmdum af þessu tagi og vísaði á VÍS. Það var auðvitað haugalygi að hann væri með einhverjar slíkar tryggingar og reyndar bætti karlhólkurinn gráu ofan á svart með því að saka tvö okkar úr hópnum um tryggingasvik! Yfirmaður hjá tryggingarfélagi sagðist ekki muna til þess að slíkar ásakanir hefðu fyrr verið bornar á nafngreinda einstaklinga í blaðaviðtali. Eðlilega veltu tryggingamenn því fyrir sér af þessu gefna tilefni hvort verið gæti að við værum í raun og veru tryggingasvikarar og komust að því að svo væri ekki.

Geymslukarlinn á sér fortíð eins og við öll og um hana fékk ég ýmislegt að heyra eftir að Vogamálið komst í hámæli. Það var hringt af Austurlandi og það var hringt af Stokkseyri. Ég hefði ekki treyst honum fyrir Fengsæli í fyrrahaust ef ég hefði vitað þá það sem ég þykist vita nú. Satt að segja hefði ég ekki einu sinni treyst honum til að geyma skóhornið okkar úr forstofunni yfir nótt, hvað þá merkilegri hluti úr búinu.

Nú gerist ég vitur eftir á og kaskótryggi Fengsæl hjá VÍS þegar hann kemur úr klössun. Því næst förum við Fengsæll í langferðir um landið og ég lofa honum því hátíðlega að vanda val á vetrargeymslu í haust. Og ég hef búið til dreifimiða með lífsreynslusögu okkar fjórmenninganna til að dreifa á tjaldstæðum í sumar. Ég verð til dæmis á landsmóti í hestaíþróttum í Svarfaðardal og á Fiskideginum mikla á Dalvík. Þar verða þúsundir manna  að sunnan með vagna í eftirdragi og ég tel ekki eftir mér að ,,ganga í hús" með flugrit til kynningar geymsluþjónustunni á Vatnsleysuströnd. Það mun ég meira að segja gera með stakri ánægju.

Athugasemdir

[þórey gylfadóttir (IP-tala skráð) 15.6.2007 kl. 16:41]

 ég rölti með þér með dreifibréfin.við skírðum hjólhýsið okkar Sælureitur og okkur var færður góður gripur í það.  grískt tákn þeir nota augasteina til að verja mann á illu . ég veit að Sælureitur og Fengsæll eiga gott sumar og ef þeir lenda í sömu geimslu  getur Fengsæll sagt honum söguna sem forveri hans lenti í vor.kveðja þórey

[Ragna Berg Gunnarsdóttir (IP-tala skráð) 15.6.2007 kl. 17:13]

Ég verð líka á ferð og flugi um landið í sumar og á eftir að láta þessa sögu heyrast til þeirra sem vilja hlusta. Og væri sannalega tilí að rölta með ykkur og dreifa bréfunum. Ég verð að velja mér nafn á greyið fellihýsið mitt eitthvað með sælu í þó það líti út eins og það hafi lent í fellibyl á Vogum. Kannski fellisæla eða sælutætir.

Kveðja Ragna