Kveðju úr sjoppu á Blönduósi komið til skila

Á leið suður af Fiskideginum mikla vék sér að mér maður í sjoppunni á Blönduósi. Sá var líka var á heimleið frá Dalvík og kvaðst hafa grun um að ég hefði einhver sambönd í baklandi Fiskidagsins.  Erindið var að hvetja mig til þess að koma nú skýrt og greinilega á framfæri við Dalvíkinga þakklæti frá gestum þeirra um helgina. Þessi viðmælandi minn hafði ekki fyrr verið gestur á Fiskideginum en mikið heyrt af samkomunni látið og talið að þar væru miklar ýkjusögur í bland. En nú hafði hann upplifað þetta allt saman sjálfur og tjáði sig aðallega með lýsingarorðum í efsta stigi.

Svona viðbrögð mátti heyra víða, líka hjá þeim sem höfðu verið áður á Fiskideginum. Það er nefnilega alveg makalaust hve gott getur lengi batnað í þessum efnum. Skreytingarnar í bænum voru að stórum hluta nýnmæli og mynduðu fínan ramma um samkomuhaldið. Reyndar var það hin besta skemmtun í sjálfu sér að labba einfaldlega um götur og líta í kringum sig. Á föstudagskvöldið opnuðu íbúar í 70 húsum híbýli sín og fóðruðu gesti og gangandi á súpum úr hvers kyns sjávarfangi. Auðfinnanlegt var að á sumum stöðum höfðu dropateljarar ekki verið brúkaðir þegar bragðbætt var í pottunum með koníaki.

Dagskráin á hafnarsvæðinu á laugardaginn var þéttari og rann betur en oft áður. Þar leið tíminn hratt. Svo má ekki gleyma veitingunum. Þar var margt góðmetið sem kunnuglegt er frá fyrri tíð, eins og til dæmis unaðsleg saltsíld frá Fáskrúðsfirði og svo auðvitað fiskborgararnir á risagrillinu. Bjarni Ningsbóndi á Völlum var í fyrra með taílenska súpu í 1.200 lítra potti en steikti í ár austurlenskar rækjubollur og hafði varla undan. Svo skal nefndur til sögu Grímur kokkur í Eyjum sem kom á Fiskidaginn í fyrsta sinn og bauð upp á magnaðan plokkfisk. Það var Dalvíkurferðar virði að komast upp á bragðið hjá Grími og nú verður skimað framvegis eftir vörunum frá honum í kæliborðum verslananna.

Gestirnir kunnu gott að meta og grillmeistarar með áralanga reynslu af Fiskidagssamkundum fyrri ára lentu í meiri vinnutörnum en nokkru sinni fyrr. Eftirspurnin var mikil og ánægjan eftir því. Þrátt fyrir að gestir hafi verið fleiri  en dæmi eru um áður, og borðað meira en nokkru sinni fyrr, var nóg eftir á lager þegar dagur var að kveldi kominn. Menn stóðu sem sagt upp á endann tímunum saman, gáfu krásir á báða bóga brosandi út að eyrum. Það var nú eitthvað annað með veitingasalann á Akureyri sem mætti til leiks með 4.000 hamborgara um verslunarmannahelgina, seldi bara þúsund stykki og nöldraði svo opinberlega yfir því í blaðaviðtali að þurfa að fylla allar frystigeymslur sínar með því sem óselt var. Náunginn sá hafði heldur takmarkaða samúð á hafnarbakkanum á Dalvík og þar heyrði stungið upp á að hann ætti bara að bíða þolinmóður til verslunarmannahelgarinnar 2008. Þá fylltist Akureyrarbær af ráðsettum borgurum sem treystandi væri til að tjalda. Hamborgararnir frá fyrra ári yrðu þá markaðssettir sem Eldri borgarar að akureyrskum hætti og rifnir út á tjaldstæðunum þar sem annars yrði aðallega hlýtt á dagskrá Rásar eitt í hátalarakerfi á kvöldin.

Fiskidagurinn mikli hefur alltaf verið haldinn í blíðviðri en nú var því spáð að út af myndi bregða svo um munaði. Veðurspámenn ríkisins gerðu í upphafi ráð fyrir samfelldri rigningu á Norðurlandi svo dögum skipti og menn sáu fyrir sér afskaplega votviðrasaman Fiskidag með tilheyrandi hrakningum og vosbúð. En veðurspáin reyndist heldur marklítil í heildina tekið. Rigningardemba kom á laugardagskvöldið, eftir að dagskrá lauk á hafnarsvæðinu, annars var þetta eftir bókinni. Meira að segja skein sólin skært á menntamálaráðherra og gesti alla þegar skóflustunga var tekin að menningarhúsinu mikla sem Sparisjóður Svarfdæla gefur byggðarlaginu.

Það sannaðist því um helgina að samningar, sem stjórn Fiskidagsins gerði forðum til 10 ára við Guð almáttugan um veðrið, standast eins og stafur á bók. Og reyndar er nú hafið yfir vafa að himnafaðirinn státar af svarfdælskum uppruna og er hallur undir sjávarútveg og alþýðlega hámenningu við Eyjafjörð. Sumir halda því reyndar fram að hann sé jafnvel íviðskiptavinur Sparisjóðs Svarfdæla. Um það vill Friðrik sparisjóðsstjóri hins vegar ekkert ræða og vísar til ákvæða í lögum um að bankaleynd nái út yfir gröf og dauða og gildi um allt guðsríkið - að eilífu, amen.

Himnavaldið er ekki fyrirsjáanlegt og minnir fínlega á sig. Sól skein til dæmis skært á skóflustungu sparisjóðsins en þegar biskupinn yfir Íslandi fór að tala yfir vináttukeðju þúsundanna neðan við Dalvíkurkirkju sigldi kólgulegt ský ofan af Böggvistaðadal og fyrir sólu. Það kólnaði jafnframt örlítið en rigndi ekkert. Má vera að embættisguðfræðin sé honum ekki alveg að skapi þarna uppi.

Veðurfræðingarnir voru fastir í rigningarspám sínum og sáu hvorki fyrir Sparisjóðssólina né kólgubakkann sem kom og fór á meðan vináttukeðjan var mynduð undir blessunarorðum biskups. Hugsanlega er eineltismoldviðrið farið að hafa áhrif á spádómsgáfuna. Kannski væri rétt að loka Veðurstofunni í eina viku í ágúst að ári, flytja hið einelta starfsfólk til Dalvíkur og búa til úr því sérhannaða vináttukeðju. Veðurklúbburinn í Dalbæ getur sem best spáð fyrir landið og miðin á meðan. Í það minnsta verður þá eitthvað að marka veðurspá fyrir Fiskidagsvikuna 2008.

• Myndir frá Fiskideginum mikla 2007

Athugasemdir

[Valdimar Gunnarsson (IP-tala skráð) 14.8.2007 kl. 10:36]

Satt segir þú höfðingi, Fiskidagurinn er ólýsanleg upplifun. Súpukvöldið sömuleiðis. Ég man varla eftir að hafa skemmt mér betur - á þennan sérstaka hátt - en á Fiskidegi. Því miður var Fiskidagurinn í fyrra sá fyrsti sem ég heimsótti en ég hef ekki trú á því að ég láti heimsókn bregðast héðan af.

Húrra, húrra, HÚRRA !

[Hilmar Guðmundsson (IP-tala skráð) 14.8.2007 kl. 14:28]

Heill og sæll frændi!

Enn ein stórkostleg Fiskidagshelgin liðin og maður segir alltaf sömu setningu ár eftir ár; það er varla hægt að toppa þetta. En alltaf tekst það aftur og aftur. Það er með ólíkindum upplifa þetta sem bæjarbúi og sjá allan þennan fjölda gesta með uppljómuð andlit af ánægju. 

Eins og segir, frábært hversu vel þetta lukkast alltaf sem auðvitað má þakka góðri stjórnun svo og virkri þátttöku bæjarbúa, líka öðrum mikilvægum þætti sem aldrei er of oft hampað - en það er allir þessir frábæru gestir sem setja svo skemmtilegan brag á hátíðina.

En frændi, tak for besøget på Den Mektige Fiskedagen og på gensyn

Hilmar frá Sigurhæðum

[Ingibjörg R Þengilsdóttir, 14.8.2007 kl. 17:28]

En frábærar myndir hjá þér, ég hef ekki enn þá komið  á fiskidaginn, en eftir að hafa skoðað myndirnar frá þér held ég að ég drífi mig á næsta ári.

Takk fyrir

Ingibjörg 

[Kristjana (IP-tala skráð) 14.8.2007 kl. 20:22]

Sæll Atli Rúnar Halldórsson.

Veit ekki hvort þú færð þennan póst. Hér gengur á ýmsu með nettengingu milli Grænlands og Íslands, og þó víðar væri leitað. Takk fyrir fínan texta um Fiskidaginn á Dalvík 07 ásamt frábærum myndum. Vildi gjarnan fá tölvupóstfangið þitt og án bloggauglýsinga!

Þarf að skamma þið soldið.

Þín Krissa

[Atli Rúnar Halldórsson, 14.8.2007 kl. 20:55]

Gaman að heyra frá þér, Krissa! Það er bara svona, mín bíða sem sagt skammir frá Grænlandi! Minn er heiðurinn að taka við þeim frá góðu grannlandi. Tölvupóstfangið er [e-mail] og sparaðu nú hvergi púðrið.....